Bartzelonako Goi Mailako Arkitektura Eskola Teknikoko (ETSABeko) Hirigintza eta Lurralde Antolamendu Sailari atxikitako ikerketa-zentroa da Bartzelonako Hirigintza Laborategia (Laboratori d'Urbanisme). 1968an sortu zen, eta Manuel de Solà irakasleak zuzentzen du. Hirigintza Saileko hainbat irakaslek parte hartu du laborategian, eta, lan batzuetan, kanpoko irakasleek ere bai. Hauek dira laborategian lantzen diren gai nagusiak: hiri-hazkunde motak eta hiri-morfologia motak; Bartzelonaren XX. mendeko garapena; hirigintzaren irakaskuntza mundu osoan; hiri-proiektuen teoria eta praktika; UR: Urbanismo Revista argitaratzea 1985az geroztik, eta hirietako hirigintzari buruzko masterrak (1991-1995).