Manuel Antonio (1900-1929) é a personalidade máis forte, fulgurante e representativa dos movementos de renovación poética e literaria da Galicia anterior a 1936. El é o máis puro e verdadeiro vangardista das nosas letras, exemplo e mestre que dun tempo para acó reivindican sobre todo as novas xeracións de poetas. Román Raña, un representante destas xeracións, guíanos nesta edición pola poesía do autor de De catro a catro (1928) con sensibilidade, erudición e sabedoría. A obra de Manuel Antonio parece hoxe máis viva que nunca entre nós.