Oon talvi ja joka paikka oon valkeanna. Yhtenä päivänä, ko Plyppi oon ulkona hihtamassa Jäneksen ja Kärpän kansa, niin net näkevä isoja jälkiä lumessa. Mikäs elukka tästä oon menny?

Plypin talvi -kirjassa lumi tullee maahan ja Plyppi näkkee, mille elukoile tullee valkea suojafäri. Plyppi leekaa Kärpän kansa piilosta ja joutuu samala karhunpessään!

Plyppi oon alun perin ruottalainen trolli, joka ellää tunturimaisemissa Ruottin Lapissa. Plypin ruottinkielinen nimi oon Plupp ja tämän kläpittenkirjahahmon oon keksiny ruottalainen Inga Borg (1925–2017). Borg kerkisi kirjottaa 26 kirjaa Plypistä elämänsä aikana, ja niitä oon käänetty monile eri kielile. Vuona 2015 Plyppiä käänethiin ensimäistä kertaa meänkielele.

Plypin kirjoista saattaa oppia pohjosen luonon vuenaikakierosta, useasti jonku elukan näkövinkkelistä. Plyppi saattaa puhua elukoitten kansa ja hänen parhhaimat kaverit oonki Kärppä ja Sopuli. Plypin tuntee sinisestä tukasta ja punasesta nokasta ja hään assuu turvekoassa Vaarajärven rannala.