Jose Luis Elorza (Oñati, 1937). Frantziskotarra. Biblia ikasketak Suitzako Friburgon, Jerusalemen eta Erroman eginak. 35 urtez Biblia irakasten jardun du eta dihardu: Arantzazuko teologaduan, Donostiako Apaizgaitegian eta Pio XII.a institutuan eta Gasteizko Teologia Fakultatean. Bibliaren irakurketa plurala (historiko-kritikoa, existentziala eta espirituala...), han eta hemen, mota askotako ikastarotan aditua izan da. Israelgo profetak eta jakintsuak. Mila urte luzetan Israel herriaren bihotza heziz joan diren bi giza jite edo aire. Profetak. Alde batetik, Jainkoaren lekuko dira; bestetik, erlijio ez-jator ororen kritiko. Gizarteko zapalduek eta nekazari pobreek jasaten duten zapalkuntzak jota bizi diren gizaki dira profetak. Aldi berean Jainkoaren esperientzia eta zuzenbide soziala eskatzen dituen erlijioa hots egiten dute. Jakintsuak. Galdera honi erantzun nahi diote: Zer egin behar du gizakiak mundu honetan zoriontsu izateko? Giza garapenerako bidea eskaini nahi dute. Baina giza bizitzako galdekizun askorekin egiten dute topo: gizakiaren mugatasuna, haren bizitza nola-halakoa izatea, gaitzaren, oinazearen eta heriotzaren zergatia, mundu honetako zintzoek eta errugabeek jasaten duten zuzengabekeria, Jainkoaren isiltasuna eta urruntasuna... Aterabiderik gabeko betiereko galderak ote dira? Ala gizakia izatearen eta geroaren iturburu den Jainkoagana irekitzen eta bideratzen duten mugaegoerak? Humanismo fededunaren inspiratzaile dira.