Este Dicionario Xerais de Sinónimos e Antónimos de Luís Castro Macía amplía e actualiza á normativa ortográfica da Academia Galega de 2003 o primeiro dicionario de sinónimos da lingua galega publicado polo mesmo autor hai máis dunha década. En cada unha das entradas sinálase, ademais da súa categorización gramatical, os sinónimos agrupados por acepcións en orde alfabética. Así mesmo, de existiren antónimos correspondentes á palabra que figura na entrada, introdúcense ao final da serie de sinónimos. Nalgunhas entradas, tamén, se introduce un apartado específico de fraseoloxía e, no caso de que algún termo puidese ofrecer dúbida, de observacións. Este Dicionario vai destinado a todo usuario da lingua galega que desexe crear un texto oral ou escrito e que precise substitutivos de termos repetidos ou simplemente desexe profundar no manexo da lingua. Pódelle interesar ao alumno que está a elaborar o seu traballo de clase, ao xornalista que escribe a súa crónica ou a calquera outro usuario con calquera outro texto. A nova presentación flexible facilita o seu uso aos estudantes de educación secundaria, sendo tamén útil para todas aquelas persoas que traballan de xeito cotiá en lingua galega e pretenden enriquecer o seu uso.