Catedrática de Filoloxía Románica da Universidade de Santiago de Compostela, a figura de Mercedes Brea constitúe un referente internacional na súa especialidade. Sobrancea, ademais, no mundo académico por distinguidos méritos tanto de xestión como de investigación. Entre outros cargos desenvolvidos, cómpre subliñar que foi vicerreitora de Profesorado, decana da Facultade de Filoloxía e directora do Servizo de Publicacións e Intercambio Científico. Coordinou a Rede de Estudos Medievais Interdisciplinares, que convocou en suxestivos proxectos comúns a medievalistas galegos especializados en distintas áreas (filoloxía, historia medieval e historia da arte). É cabeza e corazón do GI-1350, grupo de investigación competitivo e dinámico no que promove todo tipo de iniciativas consagradas á filoloxía e literatura románica medieval.A través dunha estreita colaboración co Centro Ramón Piñeiro para a Investigación en Humanidades estimulada por Mercedes Brea, Galicia e a universidade compostelá téñense situado na vangarda nos estudos de lírica galega medieval, primeiro coa publicación dos dous volumes da Lírica Profana Galego-Portuguesa e, seguidamente, coa creación da Base de datos MedB, que puxo ao dispor de toda a comunidade científica o corpus completo informatizado das cantigas profanas, proxecto no que Brea continúa a traballar de xeito infatigable e sempre con espírito innovador. O seu maxisterio callou na dirección de numerosas teses de doutoramento e, como docente vocacional preocupada pola transmisión do saber, a súa entrega e dedicación é unanimemente recoñecida por infinidade de promocións. Brillante e meticulosa, emprendedora e decidida, calculadamente ousada, paciente e xenerosa, Mercedes Brea recibe no presente volume os traballos dunha parte dos seus colegas e discípulos como testemuño de afecto, recoñecemento e gratitude á mestra e á amiga.